Ginkumpirmar sang Bacolod Police Station 6 nga ang lalaki nga nasapwan nga bangkay sa higad sang dalan sa Bangga Ibus, Barangay Tortosa, banwa sang Manapla, Negros Occidental sang Sabado nga si Reynald Quiatchon, 30 anyos, amo man ang ginatudlo nga nagapangawat sang mga manok kag kable sang kuryente sa Barangay Taculing, Bacolod City.
Si Quiatchon ang nasapwan nga may igo sang bala sa ulo kag nakabaklid ang mga kamot, may busal ang bibig kag sa tupad sang bangkay yara naman ang karton nga may nakasulat “Wag tularan, Kawatan ako!!”.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 6, ginpahayag sini nga nagakoordinar sa ila ang Manapla Municipal Police Station, matapos matumod nga ang biktima ang residente sa 3rd Road Puentebella, Barangay Taculing, Bacolod City.
Sa ila nga pagpangusisa, pila naman ka bulan nga wala na nakabalik sa Barangay Taculing ang biktima bangod nadimolish na ang ila nga balay.
Nadakpan man sadto ang magulang sang biktima sa ila puluy-an nga nagabaligya sang iligal nga droga.
Si Quiatchon ang ginatudlo naman sang madamo nga mga pumuluyo nga amo ang nagapangawat sang mga manok kag kable sang kuryente sa ila nga Barangay.
Nagapadayun pa ang imbestigasyon sang Manapla Municipal Police Station kag pagkoordinar man sang Bacolod Police Station 6 agud nga masolbar ang kaso.
