Duha ka anggulo ang ginatutukan karun sang kapulisan sa ciudad sang Sagay may angut sa pagluthang-patay sang riding in-tandem suspects sa isa ka lalaki, Sabado sang gab-i.
Una diri, nagasakay sa motorsiklo ang biktima nga si Mariano Encabo, 47-anyos sang Concheta 2, Brgy. Paraiso sang ini ang ginluthang sang mga suspetsado nga naga-angkasanay man sa motorsiklo sa Quezon St., Brgy. Poblacion 2, alas-10:25 sang Sabado.
Sa interview sang Bombo Radyo Bacolod sa hepe sang Sagay City Police Station nga si Police Major Antonio Benitez, una na sini ginpahayag nga may yara na sila sang ginatutukan nga person’s of interest kag duha man ka anggulo ang ila ginalantaw may angut sa kamatayon sini.
Ini ang ginalakipan sang iligal nga druga kag pagpamago sang biktima sa bulungan.
Suno kay Benitez, halin sa bulangan ang biktima sang ini ang ginluthang.
Ginalantaw man sang Sagay City Police Station nga, posible nagsaylo sang supplier sang iligal nga druga ang biktima.
Nahisayran nga nakaagi na nga napriso si Encabo sang una apang naka-avail ini sang plea bargaining agreement kag nagbalik naman sa iligal nga buluhaton.
