Gina-alegar mistaken identity ang pagpatay kay Darwin Nuniez nga nasapwan sang Miyerkules sa Public Cemetery sang Barangay Granada, Bacolod City nga may laslas sa liog kag tyan.
Suno kay P/Capt John Christopher Masangkay, station commander sang Bacolod Police Station 5, nagakoordinar sa ila ang kaupod sang biktima antes ginpatay nga si alyas Christian, 18 anyos.
Alegasyon sini nga dako ang posibilidad nga siya ang target sang mga suspetsado apang nasal-an lang si Nuniez.
Maduduman nga duha ang nagtransaksyon sang pagbaligya sang marijuana sa duha ka mga suspetsado sang Martes sang gab-i kun sa diin matapos ang transaksyon, nagtanyag ang mga suspetsado nga hatagan sila sang P200 nga pang gasolina sa motorsiklo apang nagpaupod ang mga ini sa sulod sang sementeryo agud pangitaon ang gina-alegar wallet sang suspetsado nga nahulog.
Nagapati si Christian nga siya kuntani ang target bangod nagikan man sa iya ang mga katransaksyon sa iligal nga marijuana apang iya lang ini ginpasa kay Nuniez nga amo ang nagabaligya.
Bangod sini, ginalantaw nga mahimo nasal-an sang mga ginsugo sa pagpatay nga si Nuniez ang ila nga target.
Apisar nga indi kilala ni Christian ang pangalan sang mga nakatransaksyon, nagpahayag man ini nga mahimo iya makilala ang itsura sang mga ini kun iya nga makita.
Suno kay Masangkay, indi pa makabig nga suspect ang amay sang babayi nga gintumod ni Christian bangod wala man sang ebidensya nga naga-angot sa iya sa krimen.
Nagapakig-angot naman ang Bacolod Police Station 5 sa nasambit nga pamilya.
