Makaduha na ka beses nadakpan sa anti-drug operation sang mga pulis ang lalaki nga ginpatay sang wala pa nakilala nga mga suspetsado sa sulod mismo sang Vendors Plaza sang Martes sang kaagahon.
Suno kay Punong Barangay Joan Magalona sang Barangay 8, ciudad sang Bacolod nga naka-indicate sa address sang biktima, si Eduardo Dinosta ang una nga nadakpan sang Bacolod Police Station 2 sa buybust operation nga ginpatigayon sa Purok Fire, Barangay 8 pila na ka tuig ang nakaligad.
Sang nakagwa ini sa prisuhan, nadakpan naman liwat si Dinosta sa raid sang Bacolod Police Station 7 sa pribado nga lote sa likod sang National Food Authority Bacolod Branch kun sa diin madamo sila nga nadakpan.
Indi naman matumod kun nakapyansa si Dinosta ukon nag-avail sang plea bargaining agreement gani nakagwa sa prisuhan.
Sa karon, wala na sang mga pamalay sa likod sang NFA Bacolod bangud gindemolish na sang tag-iya sang pribado nga propiedad.
Santo sa pagkahibalo ni Magalona, sultero pa si Dinosta apang wala na ini sang ginikanan.
Tubtub sa karon, wala pa sang natumod nga suspetsado sa pagpatay kay Dinosta ginabanta alas-4:00 sang kaagahon sang Miyerkules kun sa diin isa ka lupok ang nabatian sang mga pulis.
Base sa imbestigasyon, sa ulo gintiro si Dinosta.
