Isa ka bangkay sang lalaki nga wala na sang ulo ang nasapwan sa Dalan Rosario, Barangay 38, Bacolod City kagab-i.
Suno sa mga nakasaksi, duha ka pribado nga salakyan ang nagdulog sa lugar kag ginbilin ang lawas.
Ang bangkay ang nagakulob sa higad sang dalan kag nakabaklid ang mga kamot.
May nagpahayag man nga may mga lupok sila nga nabatian antes ginbilin ang bangkay nga gin-utdan sang ulo.
Sa tupad sini nakit-an ang karatula nga may mga tinaga nga, “Bayad sa utang, interes pa lang, capital preparar para suma total. Halong, Bacolod”.
Sa amo man nga lugar ginluthang-patay si Police Staff Sergeant Joseph Nepomuceno tinalikdan nga Domingo sang hapon.
Pila ka minutos ang nakaligad, nasapwan naman ang isa ka ulo sang lalaki sa Purok Sigay, Barangay 2, apang wala pa sang kumpirmasyon kun iya ini sang lalaki nga nasapwan sa Barangay 38.
Suno sa mga residente sa Purok Sigay, may nabatian sila nga paglupok antes ginbilin ang ulo.
Ginpahayag man sang punong barangay sang Barangay 38 nga ginbilin lamang ang bangkay kag indi ini residente sa lugar.
