Ginaalegar drug personality ang lalaki nga nasapwan nga patay sa Bangga Pilar, Brgy. Magdalena, Hinigaran, Negros Occidental, kahapon sang kaagahon.
Sa interview sang Bombo Radyo Bacolod kay Police Major John Ganzon, hepe sang Hinigaran Municipal Police Station, nagkig-angot sila sa iban nga mga police station gani nakakuha sang profile sang biktima.
Ginkilala ini kay Bartolome Lanayon, residente sang Kabankalan City.
Siya ang ginbilin sa kakahuyan sa nasambit nga lugar apang ginatumod pa kun ano ang paagi sa pagpatay sa biktima.
Gina-alegar nga rank 3 sa drug watchlist sang Kabankalan City Police Station si Lanayon kag drug surrenderer man sang nasambit nga police station.
Ginaalegar man nga anay miyembro sang bugalon drug group si Lanayon.
Suno kay Ganzon, magluwas sa profile sang iban nga police station nga malapit sa lugar, ginkilala man ang biktima sang anak sini.
Personal nga ginalantaw sang hepe nga mahimo may nakatransaction ang biktima sa illegal nga drugs sa banwa sang Hinigaran kag wala sila nag-intindihanay rason nga ginpatay ini.
