Wala na sang kabuhi ang 39-anyos nga lalaki sang ini ang nasapwan sa kanal sa higad sang kampo sang tubo sa EB Magalona diri sa Negros Occidental kaina sang aga.
Sa interview sang Bombo Radyo Bacolod kay Police Captain Wilfredo Benoman, hepe sang EB Magalona Municipal Police Station, nasapwan ang bangkay sa Purok 5, Brgy. Sto. Niño, pasado alas-6:00 kaina sang aga.
Ginkilala ang biktima kay Niel Andy Archangel kag residente sang Sitio Panawsawon, Brgy. Tuburan, sang nasambit nga banwa nga gin-identify man mismo sang iya magulang.
Ang nakakita sang bangkay ang mga nagajogging kag ila nga ginreport sa punong barangay nga ginpahibalo man sa EB Magalona Municipal Police Station.
Suno kay Benoman, may duha ka igo sang bala sa ulo ang biktima kag nakagapos ang kamot sini sang ginhal-id sa kanal kag may yara sang nakabutang sa kilid sini nga karton nga may sulat nga kawatan ako.
Ginalantaw nga may kaangtanan sa pagpangawat ang isa sa motibo sa pagpatay diri.
Suno sa hepe, si Archangel ang may yara sang kaso nga robbery nga ginpasaka sadtong Agosto 30, 2012.
Ginalantaw sang mga pulis nga wala na nagpagamo pa ang ginkawatan sang biktima nga nagaliho-liho antes nasapwan nga napatay, apang ginausisa pa man ang iban nga motibo sa krimen.
