Nasapwan na lamang nga nagakaya kag duguon ang isa ka lalaki sa basurahan sa Palanca Road, Barangay 8, Bacolod City, pasado alas 3:30, Martes sang hapon.
Sa initial nga impormasyon, ang biktima ang ginkilala kay Mark Diculungon, yara sa 37 ang pang-edaron, residente sang Florenceville Subdivision, Barangay Pahanocoy, Bacolod City apang may live-in partner sa Barangay 8.
Siya ang gin-identify sang iya pakaisa nga si Jermond Bravo Dolosa.
Suno kay Police Captain Paul Vincent Pendon, station commander sang Bacolod Police Station 2, ang biktima ang may pilas sa dughan tuga sang pagpangluthang kag indi pa maathag kun may pilas ini sa ulo.
Narecover sa crime scene ang isa ka empty shell sang wala pa nahibaluan nga sahi sang armas luthang.
Suno kay Pendon, nakabati ang isa ka security guard sa area sang lima ka lupok kag pagtsekyar sini, siya ang may nakit-an nga motorsiklo nga nagapadulong sa Jalandon area ukon north.
Suno sa tiyo sang biktima nga si Dante Borbon wala sang kontra ang iya hibalos apang nakaagi ini priso bangud sa kaso nga theft apang nakagwa naman sa prisuhan.
Suno sa iya, nagagamit si Mark sang illegal nga druga apang wala nagaduso.
Wala man sang permanente nga trabaho ang iya nga hinablos.
Ginalantaw sang kapulisan nga pagtimalos ang motibo sa krimen bangud kilala nga nagapanguha sang gamit sa lugar ang biktima.
Sa karun nagapadayon pa ang imbestigasyon sang kapulisan.
