Nagtuyo nga maghikog ang 33-anyos nga lalaki matapos nga magsaka ini sa tower sang National Grid Corporation of the Philippines (NGCP) sa Purok Paraiso, Barangay Mansilingan ciudad sang Bacolod kahapon.
Ginkilala ang persona kay Ives Pilua sang Purok Cabugwason sa nasambit nga barangay.
Sa interview sang Bombo Radyo Bacolod kay Pilua, ginpahayag sini nga problema sa pamilya ang rason kun ngaa nagtuyo ini nga magpanginmatay.
Suno sa iya, luyag niya lamang nga makaupod ang duha sini ka mga kabataan nga lunsay menor de edad nga yara sa kustodiya sang iya live-in partner.
Nahibaluan nga tatlo ka tuig na sila nga bulagay.
Samtang, suno naman sa utod sini nga si Irene, ginpabalo lamang siya sang ila mga kaingod nga nagsaka ang iya magulang sa NGCP tower takna alas-10:00 kahapon sang aga.
Suno diri, wala sang kinan-an kag tinulugan ang iya magulang antes ang insidente.
Madumduman nga matapos makit-an ni Pilua ang duha niya ka mga kabataan didto na kag nagpanaog ini sa tower pasado alas-4:00 sa hapon.
Gindala naman siya sang rescue team sa barangay hall sang Barangay Mansilingan kag boluntaryo sini nga ginsurrender kay Punong Barangay Rodolfo “Boy” Pico Jr. ang isa ka sachet sang suspected shabu.
Gilayon naman siya nga ginkuha sang kapulisan kag naka-kustodiya karon sa Bacolod Police Station 7.
