Padayun ang panawagan sa kun sin-o man ang himata sang driver sang motorsiklo nga napatay matapos maaksidente sa Bagong Dalan, Prk Neptune, Brgy. Singcang Airport sang Enero 1, nga tubtob sa karun wala pa makilal-an.
Sa interview sang Bombo Radyo Bacolod kay Police Lt. Col. Ramil Sarona, head sang Traffic Enforcement Unit sang Bacolod City Police Office, ang lawas sang biktima ang yara sa Villacrusis Funeral Homes sa Barangay Mansilingan, Bacolod City.
Una na nga ginpahayag ni Sarona nga ang biktima ang ginabanta 25 tubtob 30 anyos kag 5-foot-4 tubtob 5-foot-6 ang kataason.
Ini ang nakashort kag blue nga bayo, wala sang helmet kag nagadrive sang Yamaha Mio125 padulong sa sur nga dereksyon.
Ang biktima ang ginapahayag nga nag-awas sa highway padulong sa talamnan sang humay apang nagbunggo sa bato ang iya nga ulo.
Sa sin-o man nga himata ukon mahimo nakakilala sa biktima, magdangop lamang sa punerarya agud ini ang makumpirmar.
Magdala lamang sang pamatuod nga himata ang biktima agud ini ang mahatagan sang disente nga lubong sang pamilya.
Apang kun madugayan kag wala gihapon sang magclaim sa bangkay, ini ang ipalubong na lamang sang ciudad.
