Arestado ang isa ka 38-anyos nga lalaki matapos nga na-aksidente kag nakuhaan sang masobra P400,000 nga balor sang suspected shabu sa KM Trese y Media, Barangay Taloc, Bago City, Negros Occidental,sang Domingo, Enero 12.
Ginkilala ang nadakpan kay Robert Bustamante, 38-anyos, sultero, mekaniko, ginakabig nga High Value Individual (HVI), kag residente sang Purok Bungyod, Barangay 3, Himamaylan City, Negros Occidental.
Sa interview sang Bombo Radyo kay Police Lieutenant Colonel Jay F. Malong, hepe sang Bago City Police Station, may nagreport nga may nagluntad nga traffic incident gani ginresponderan man sang traffic investigator.
Suno kay Malong, pag-abot sang traffic investigator sa lugar, gilayon nga ginlantaw ang mga papeles sang suspetsado kag bangud sang ila man nakita nga isa ka improvised glass tooter kag indi niya pagbuya sa plastic nga iya gina-uyatan, nagduda na ang mga ini.
Didto gin-usisa sang mga pulis ang unod sang plastic nga iya gina-uyatan kag nakita ang tatlo ka mga dalagko nga mga sachets sang suspected shabu nga ginabanta nagabug-at sang 67 ka gramos kag nagabalor sang P456,000.
Kalakip man sa nakuha amo ang isa ka improvised glass tooter, isa ka cellphone, kag kwarta nga nagabalor sang P1,580.
Halin sa ciudad sang Bacolod ang suspetsado sakay sang iya Suzuki 150CC Raider nga motorsiklo kag papauli na kuntani sa ciudad sang Himamaylan.
Pag-abot sa lugar sang aksidente, gintinguhaan sini nga mag-over take sa truck nga gapaliko sa tuo nga direksyon, apang wala ini nakahingagaw kag nabunggo sa truck.
Bangud sa impact, natumba ang suspetsado kag indi na sini masarangan nga makatindog pa bangud sa naangkon nga samad sa hawak.
Dugang pa ni Malong, samtang ginabuligan sang mga residente ang suspetsado, may nakita sila nga isa ka improvised glass tooter kag indi sini pagbuy-an ang plastic nga iya gina-uyatan.
Ginabulong sa karun sa Bago City Hospital ang biktima bangud sa samad nga naagom kag ini ang mangatubang sang kaso nga paglapas sang R.A 9165 ukon ang Comprehensive Dangerous Drugs Act of 2002.
