Patay ang lalaki nga nagikan sa isa ka birthday party matapos maaksidente sa ginamaneho nga motorsiklo kag nahulog sa banglid sa Hda. Mandayao, Barangay Mansalanao, La Castellana, Negros Occidental Martes sang gab-i.
Suno kay P/Staff Sgt. Francis Barillos, imbestigador sang La Castellana Municipal Police Station, may nagpadangat sa ila sang impormasyon natuhoy sa nasapwan nga bangkay sa nasambit nga lugar alas-7:00 sang aga.
Gilayon naman nila ini nga gin-respondihan kag nakita ang lawas sang isa ka lalaki nga nagahapaon samtang yara naman sa tupad ang motorsiklo sini.
Ang biktima ang ginkilala kay Rosilier Nanit, 49 anyos, isa ka security guard kag residente sa Barangay Nabulao, Sipalay City.
Santo sa imbestigasyon, ang biktima ang nagikan sa isa ka birthaday party sang iya hinablos sa Barangay Bi-ak na Bato, La Castellana sang Martes.
Suno sa magulang sini, naghalin ang biktima sa selebrasyon kag nagpauli takna alas-8:00 sang gab-i agud nga magpadulong sa ginatrabahuan sa Bacolod bilang isa ka security guard.
Wala pa man nahibaluan kun hubog ang biktima kag ginalantaw man ang posibilidad nga kapoy ini rason nga naaksidente.
Ginalantaw nga samtang nagapadulhog ini sa kurbadahan nga dalan, naglapaw ang motorsiklo sini sa lane kag nagderetso sa banglid.
Bangod wala sang panimalay ang lugar, wala gilayon sang may nakakita sang biktima kag nasapwan nalang ini sang aga na.
Nasapwan ang biktima ni Edmund Mendoza residente sa lugar, kag magapahalab kuntani sang karbaw.
