Nasapwan nga wala na sang kabuhi ang 35 anyos nga lalaki nga nagtabok sa spillway sa Purok Chichirica, Barangay East, Candoni, Negros Occidental sang Dominggo, alas-3:00 sang hapon.
Ang biktima ang ginkilala nga si Jemwuel Pat, residente sang Sitio Panacmalan, Barangay East, sa nasambit nga banwa.
Sa interview kay Police Lt Leonel Adolacion, acting chief of police sang Candoni Municipal Police Station, kaupod ni Pat ang iya utod nga matabok sa spillway apang aksidente nga nadanlog si Pat kag naanod sang makusog nga daludo sang tubig.
Suno diri, antes pa man magtabok, nakita na sang mag-utod nga naglapaw na ang tubig sa spillway.
Nangayo sang bulig ang utod ni Pat apang wala na ini natigayon nga mabuligan pa.
Matapos ang 15 ka oras, nasapwan ang bangkay ni Pat alas- 9:15 sang aga sang Lunes.
