Wala pa gihapon makilala ang lalaki nga nabungguan-patay sang truck sa Bacolod-Silay Access Road sa Hacienda Otilia, Barangay Efigenio Lizares, Talisay City, Negros Occidental.
Sa interview sang Bombo Radyo Bacolod kay Police Major Rhazil Jim Jocson, deputy chief of Police sang Talisay City Police Station, nakagwa na gikan sa ila kustodiya ang driver sang truck nga si Placido Tibor Jr., 46 anyos, lalaki, kasado kag residente sang Brgy. Malingin, Bago City matapos maglapse ang reglementary period.
Madumduman nga natabo ang aksidente sang Enero 5 sang gab-i kun sa diin wala matalupangdan ni Tibor ang pagtabok sang biktima bangod sa madulom nga lugar.
Suno kay Jocson, ang biktima ang wala gid sang ID kag wala man sang indentification marks sa lawas kaangay sang tattoo.
Apang ini ang nakasuksok sang itom nga tshirt, itom nga shorts kag naka-sinelas.
Ini ang ginabanta yara sa 35 tubtob 40 anyos, medium built kag may kataason nga 5-foot-3.
Nagapanawagan si Jocson sa may himata nga wala pa makapauli kay parehas sa ginhatag nga description, nga magdangop lamang sa Talisay City Police Station ukon sa Manapla Funeral Homes sa Silay City, sa pag-identify sang bangkay.
Hinali nga makilala na sang pamilya, sila ang sarang gihapon nga makapasaka sang kaso batok kay Tibor paagi sa regular filing.
