Ginbawian sang kabuhi ang isa ka lalaki nga nagabisekleta matapos mabungguan sang isa ka taxi pasado alas onse sang gab-i, Mayo 18, sa National Highway sang Brgy. Mabini, Valladolid, Negros Occidental.
Ginkilala ang biktima nga si Jiger Galanto, soltero, kag residente sang Purok Kalubihan, Brgy. Patic, Pulupandan, Negros Occidental, samtang ang nagamaneho naman sang Taxi amo si alyas “Bobby”.
Sa interview sang Bombo Radyo Bacolod kay PCapt. Celso Omega, Deputy Chief of Police sang Valladolid Municipal Police Station, nakita nga duguon ang biktima kag may head injury sa tunga sang dalanon.
Ang salakyan naman ang nahulog sa kanal samtang wala mahibaluan kun diin ang driver sini.
Sa inisyal nga imbestigasyon sang kapulisan, nakainom sang makahulubog nga ilimnon ang biktima antes natabo ang insidente.
Suno kay Omega, padulong sa naaminhan nga direksyon ang Taxi naggikan sa south apang ang bisekleta naman ang nagtabok sa national highway naggikan sa nakatungdan nga bahin padulong sa nasidlangan nga direksyon sang sila ang nagbungguanay sa center lane sa boundary sang Valladolid kag Pulupandan.
Suno diri, gindala pa sa Valladolid District Hospital ang biktima apang gindeklarar ini nga dead on arrival bangud sa head injury nga nangin tunaan sang iya kamatayon.
Makaligad ang pila ka oras, nakita sang mga otoridad ang driver nga nagapasilong malapit sa lugar sang insidente.
Suno diri, wala sang katuyuan ang driver nga magpalagyo apang nahadlok lang ini nga posible magtimalos ang mga himata sang biktima.
Ginpahayag man ni Omega nga nakaareglohanay na sa tunga sang driver kag mga himata sang napatay samtang wala na sila sang plano nga magpasaka sang kaso sa baylo pagasabton ang tanan nga expenses sa pagpalubong.
Pahanumdom ni Omega, likawan ang pagmaneho kun yara sa impluwensya sang makahulubog nga ilimnon agud malikawan ang kaangay nga insidente.
