Patay ang 34-anyos nga lalaki matapos gintiro sang wala pa makilal-an nga mga suspetsado sa 20th Street-Lacson, Bacolod City pasado alas 10:00 kagab-i.
Sa interview sang Bombo Radyo sa live-in partner sini nga si Kimberly Mendoza, masami ini nga ginasugat sang biktima nga si Joselito Villanueva, legal ang edad kag residente sang Purok Rosal, Barangay Singcang Airport, Bacolod City, nagikan sa iya ginatrabahuan nga Spa.
Si Villanueva ang anay operations officer sa isa ka security company kag sa karun nagapaarkila sila sang mga van.
Kagab-i, pasado alas 10:00, nagapungko si Villanueva sa atubang sang spa sang ini ang ginluthang sang wala pa makilal-an nga mga persona.
Ginalantaw sang kapulisan nga masobra duha ka mga persona ang nagluthang diri bangud masobra 20 ka mga empty shells sang wala pa mahibaluan nga sahi sang armas luthang ang nakuha sa lugar.
Suno kay Mendoza, wala ini sang ideya kun sin-o ang naghimo sini sa iya live-in partner bangud wala man ini sang kontra kag wala man sang kaangtanan sa illegal nga druga.
Samtang, makaduha ka beses naman nga nakabaton sang pagpamahog ang biktima pinaagi sa text suno sa iya utod nga si Josette.
Suno diri, nakabaton ini sang mensahe sang Hunyo sang tinalikdan nga tuig nga dapat maghalong si Joselito bangud unahon nila ini kag amat-amaton ang ila pamilya.
Suno kay Josette, tatlo ka tuig na ang nakaligad sang may natabo sa banwa sang Hinigaran kun sa diin may ginsumbag ini nga hubog.
Ginalantaw man sini nga posible may kaangtanan sa mga nakarelasyon ni Joselito ang natabo.
Suno sa iya, bulag na ang biktima sa iya asawa kag may tatlo ka mga kabataan diri.
Antes sini nakarelasyon ang iya live-in partner sa karun, may walo pa ini ka mga babaye nga nangin nobya.
May yara naman sang CCTV sa lugar kag ini ang pagatsekyaron pa sang kapulisan agud mahibaluan kun paano nagluntad ang krimen.
