Dakop ang isa ka lalaki nga nagapakuno-kuno nga katapo sang Philippine National Police matapos ginserbehan sang warrant of arrest sa Aglipay Street, Barangay 1-B, Manapla, Negros Occidental sang Lunes, Hunyo 2.
Ginkilala ang arestado kay Rodolfo Ortega, 49 anyos, lalaki, kasado, wala sang trabaho kag residente sang nasambit nga lugar.
Siya ang nakahunong sa karun sa Talisay City Police Station.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, ang nadakpan ang may apat ka kaso kun sa diin ang una amo sadtong August 4, 2023 nga gindakop ini paagi sa warrant of arrest sa bahin sang Camella Homes, Barangay Mandalagan, Bacolod City sa kaso nga Falsification of authority or official functions; RPC 117 kag paglapas sa RA10591 ukon Comprehensive Firearms and Ammunition Regulation Act bangud sang gin-aresto nila ini nakuhaan nila sang armas.
Suno kay Jocson sang August 14, 2023 ginserbehan naman si Ortega sang isa pa gid ka warrant of arrest bangud sa paglapas sang Article 315 ukon Estafa kun sa diin ginbasa ang kaundan sang warrant of arrest sini sa sulod na sang custodial facility sang Talisay City Police Station.
Samtang may nagwa naman nga dugang nga warrant of arrest batok kay Ortega sa kaso nga paglapas sang Section 38 sang RA 10591 ukon Comprehensive Firearms and Ammunition Regulation Act kag paglapas sa RA 9165 ukon Comprehensive Dangerous Drugs Act of 2002 sang July 5, 2024 sa District North Point Ayala, Talisay City.
Dugang ni Jocson, ang ulihi nga warrant of arrest nga ginserbe kay Ortega amo ang sang tinalikdan nga Hunyo 2 sa kaso nga may kaangtaan sa mga firearms sini.
Ang warrant of arrest ang ginpagwa ni Hon Enrico Voltaire G Almeda, Presiding Judge sa Sixth Judicial Region, Regional Trial Court, Branch 54, Bacolod City, Negros Occidental sang Enero 24, 2025 kag wala sang recommended nga piyansa.
