Arestado ang isa ka lalaki nga una na nga nakastiguhan sang mga bystanders matapos ang gina-alegar pagpangayo-kayo kag nagapanaya sang kutsilyo sa bahin sang South Ceres Terminal, Barangay 31, Bacolod City.
Sa interview sang Bombo Radyo kay Police Captain Rosalino Pugoy, Station Commander sang Bacolod Police Station 6, may nabaton sila nga report nga may yara sang isa ka lalaki nga nagapangayo-kayo kag nagapanaya pa sang dala nga kutsilyo sa nasambit nga lugar.
Suno kay Pugoy, gilayon man nga ginrespondehan ini sang mga kapulisan apang sang nakaabot ang mga ini ang lalaki ang nakastiguhan na sang mga bystanders sa lugar.
Ang lalaki ang ginapahayag nga residente sang Esperanza, Bago City.
Wala man naestablisyar kun may ginatiniran ini sa ciudad sang Bacolod apang ginalantaw nga mahimo nga nagaliyong lang ini kag nagapangayo-kayo sa lugar.
Ginahulat man sang Bacolod Police Station 6 ang nagreklamo sa lalaki agud nga mapasakaan ini sang kaso.
Panawagan ni Pugoy sa mga pumuluyo nga kun may matabo nga kaangay nga insidente nga magpalapit man ang mga ini sa police station agud magfile sang complaint para mapasakaan ang mga ini sang kaso.
Ginalantaw man nga mahimo nakagamit sang illegal nga druga ang nadakpan.
