Lalaki nga nagapangayo-kayo, patay matapos ginbuno sang service crew sang bar sa San Carlos City

Dead on arrival ang lalaki nga nagapangayo-kayo matapos ginbuno sang service crew sang isa ka bar sa Barangay 5, San Carlos City, Negros Occidental, kahapon, alas- 4:37 sang kaagahon.

Ang biktima ang ginkilala nga si Alias Eurick, residente sang Ylagan Street, Brgy. 6, San Carlos City.

Sa interview sang Bombo Radyo kay Police Capt. Rodney Sarona, Deputy Chief of Police sang San Carlos City Police Station, nagapangayo-kayo sang kwarta si Eurick sa bar apang ginsaway ini sang service crew kag didto na nagluntad ang pagbina-isay.

Ginbuno sang service crew si Eurick sang tatlo ka beses sa tyan kag ginhingagaw ini dala sa ospital apang gindeklarar nga dead on arrival.