Patay ang isa ka lalaki matapos gintiro sang suspetsado nga nagasakay sa motorsiklo samtang nagatindog ini sa likod sang motel sa Purok Gracia, Barangay Singcang-Airport, Bacolod City, kagab-i.
Ginkilala ang biktima kay Angelo Tamparong.
Natukiban man nga indi ini residente sa lugar apang may ginakadtuan nga kahagugma.
Santo sa inisyal nga impormasyon, nakabati lang sang lupok ang mga pumuluyo sa lugar kag nasapwan nalang ang nagahamyangon na ang duguon nga biktima.
Wala naman sang iban nga pumuluyo nga nakakita sa insidente bangod yara na sa sulod sang panimalay ang mga tawo sa palibot bangod sa gab-i na.
Ang lugar kun sa diin gintiro si Tamparong ang yara na sa likod nga bahin sang isa ka motel sa Barangay Singcang-Airport kag malayo sa main road gani tumalagsahon lang ang makakita sang mga yara sa gwa.
Gilayon naman nga gindala ang biktima sa ospital upod ang ginapatihan live-in partner sini nga iya ginpadulungan apang ginbawian ini sang kabuhi.
Nakuha sa crime scene ang itom nga kalo, facemask kag isa ka tsinelas sang biktima.
Samtang narecover man sa lugar ang isa ka fired cartridge sang wala pa matumod nga kalibre sang armas.
Sa karun padayun pa nga nagapatigayun sang imbestigasyon ang Bacolod Police Station 8 natuhoy sa insidente.
