Arestado ang isa ka suspect sa pagpamuno sa isa ka police personnel sa ginpatigayon nga hot pursuit operation sa kapulisan sang Murcia Municipal Police Station kaupod ang iban pa nga police units kahapon, Disyembre 28, sa Purok Mabuhay, Barangay, Pandanon, Don Salvador Benedicto, Negros Occidental.
Ginkilala ang suspek kay alyas Oian, 29 anyos, single, wala sang trabaho kag residente sang Purok Super L, Barangay Pandanon, Murcia, Negros Occidental.
Ang biktima ang isa ka 36-anyos nga may ranggo nga Police Staff Sergeant kag residente sa banwa sang Murcia.
Una na nga ginreport sang Murcia Municipal Police Station nga samtang nagakatulog ang biktima sa puluy-an sang iya abyan, nakabugtaw ini matapos nga may nabatian nga komosyo sagwa sang balay.
Nagwa ini sa tinutuyo nga magtambag apang ginbuno ini sang makapila ka beses gamit ang kutsilyo.
Sa karun maayo na ang kahimtangan sang pulis.
Nakahunong na sa prisuhan ang suspek kag natalana nga pasakaan sang nagakaigo nga kaso.
