Padayon nga ginapangita ang lalaki nga naglumpat sa Roll-on/roll-off (RoRo) vessels nga nagbyahe gikan sa San Carlos City padulong sa probinsya sang Cebu sang Biyernes alas- 6:40 sang gab-i.
Sa interview sang Bombo Radyo Bacolod kay Lt. Junior Grade Richelito Arbis, Assistant Station Commander sang Philippine Coast Guard Northern Negros Occidental, ang lalaki ginkilala lamang santo sa pangalan sini nga ginbutang sa logbook nga Jessie Ruben kag wala na ini nagbutang pa sang edad kag sang iya address.
Suno diri, nakit-an sang isa ka crew nga nagsaka sa railings ang lalaki nga ginabanta naga-edad sang 50 tubtob 60 kag hinali lang ini naglumpat.
Nag-untat kadali ang vessel para matsekyar kun may kaupod ang lalaki sa pagbyahe apang wala sang may nakakilala sa iya.
Nagpadayon sa pagbyahe ang barko samtang nagtinir naman sa lugar ang City Disaster Risk Reduction and Management Office (CDRRMO), Philippine Coast Guard (PCG), bantay dagat kag mga mananagat para pangitaon ang lalaki.
Pahayag ni Arbis padayon ang ila search and rescue operation para makit-an ang lalaki nga naglumpat sa RoRo.
