Nasapwan nga wala na sang kabuhi ang 43 anyos nga lalaki matapos nga naglumpat sa suba sa Sitio Wayang, Barangay III, Himamaylan City, kahapon, alas- 9:30 sang aga.
Sa interview sang Bombo Radyo kay PLt Col Anthony Grande, hepe sang Himamaylan City Police Station, ang biktima ang ginkilala nga si Petronilo Dabandan, residente sang Sitio Poblador, Brgy Mambagaton, Himamaylan City.
Suno diri, papauli na si Dabandan matapos nga nag-inom sang makahulobog nga ilimnon kaupod ang iya mga abyan.
Naglabay sa suba si Dabandan apang nakibot ang iya mga abyan nga naglumpat ini sa suba.
Bangod nga malapit lang man ang balay sini sa suba, nagpinsar ang iya mga abyan nga naglangoy lang siya papauli.
Apang, kahapon sang aga nasapwan na lang si Dabandan nga wala na sang kabuhi.
Pahayag ni Grande padayon ang ila imbestigasyon sa natabo nga pagkapatay sang biktima.
