Subong nga tiyempo wala kana makahibalo kun sin-o ang saligan mo ukon makasalig kapa bala?
Sa Italy, isa ka 70 anyos ang gin-akusar bangud gin-alegar nga nagapakuno-kuno nga bulag sa sulod na sang 50 ka tuig.
Bangud sini nakatipon na siya sang masobra sa 1 million Euros ukon masobra P67 million sa disability payments.
Nangin kontrobesiya man sa verification mechanisms sang Italy para sa subsidies kag disability payments ang kaso sang lalaki.
Gindeklarar nga bulag ini matapos ang insidente sa iya nga trabaho rason nga nakabaton ini sang benepisyo.
Sang nagpatigayon sang cross-checks ang finance police sang Vicenza provincial command, nakuha ang ila atensyon gani ginsundan nila ini.
Didto nila nadiskubrehan nga nagapang-garden ini gamit ang delikado nga tools kag maid-id nga nagatsekyar sa mga produkto sa merkado antes magbakal.
Sa sulod sang duha ka bulan, ginsunod nila ini kag napamatud-an nga indi ini bulag.
Bangud sini, ginpasakaan ini sang kaso sa Vicenza prosecutor’s office.
Gilayon nga gin-suspend ang iya welfare kag social security benefits.
Ginpabayad man ini sang buwis nga masobra 200,000 euro ukon masobra P15 million.
