Dakop ang 38 anyos nga lalaki nga nagpakuno-kuno nga pulis nga nagapangilkil kag nagapamahog sa mga biktima sini.
Ang suspetsado ang ginkilala nga si Alias John, single kag resident sang Koronadal City, South Cotabato.
Sa interview sang Bombo Radyo Bacolod kay Police Lt Col. Antonio Benitez, pinuno sang City Drug Enforcement Unit, nagapakilala si Alias John bilang “PMAJ Calsado”.
Suno diri, may nagreport sa ila nga negosyante nga ginpahog sila ni Alias John kag ginapangayoan sila sang kwarta tubtob nga ginapahog na sila.
Nadakpan si Alias John paagi sa entrapment operation sa gwa sang hotel sa Barangay Singcang-Airport sang kahapon.
Natukiban nga may 16 ka transaction nga ginpatigayon kun sa diin nagdangat sa P700,000 tanan ang nakawat sini sa biktima.
Pahayag ni Benitez, kun sin-o man ang nabiktima sang nagpakuno-kuno nga pulis nga magreport sa ila agud madugangan ang mapasaka nga kaso batok sa suspetsado.
Pa-athag sini, indi buluhaton sang police nga mangilkil bangod ginabawal ini sa layi.
