Arestado ang 44 anyos nga lalaki matapos maaktuhan nga nagakapot sang indi rehistrado nga armas-luthang kag nakuhaan pa sang illegal nga droga sa Sitio Enclaro, Binalbagan, Negros Occidental.
Sa interview sang Bombo Radyo Bacolod kay Police Lt. Glenn Fortunes, deputy chief sa Binalbagan Municipal Police Station, sila ang nakabatun sang report nga nagpalupok sang armas-luthang ang suspetsado nga si Jethro Genovea, 44 anyos.
Ini ang ila ginresponderan kag naaktuhan mismo nga yara pa sa kamot sang suspect ang M4 rifle.
Ginapakamaayo na lamang ni Fortunes nga wala na nagbato ang suspetsado apisar nga ini ang ginakonsiderar highly armed and dangerous.
Suno diri si Genovea ang suspect man sa pagpangluthang-patay sang nakaligad nga mga binulan gamit ang nasambitan nga armas-luthang.
Apang nagfile naman sang affidavit of non-interest ang pamilya sang biktima gani wala napasakaan sang kaso ang suspetsado.
Dugang pa ni Fortunes nga sang gina-aresto ang suspetsado, nakuhaan ini sang 10 ka gramos sang suspected shabu nga may standard drug price nga P68,000.
Ang suspect ang yara naman sa drugs watch list sang Barangay kag natalana naman kuntani nga patigayunan sang drug buybust operation.
Suno kay Fortunes, illegal nga droga man ang kabangdanan sa pagpangluthang sini tinalikdan nga binulan, bangod durugista man ang biktima.
Samtang apisar nga madugay na ang illegal nga transaksyon sang suspetsado, ini ang wala man ginareport sang iya mga kasilingan bangod ini ang kaangay nga robinhood kag ginapanghatagan ang yara sa iya palibot sang kita sini sa pagbaligya sang illegal nga droga.
