Ginpahayag sang hepe sang Talisay City Police Station nga ginklaro sang security agency nga nagabantay sa gina-agawan nga duta sa Hacienda San Antonio 2, Barangay Dos Hermanas, Talisay City nga indi nila tawo ang lalaki nga nakita sa video nga nagpanutok kag nagpalupok sang armas-luthang.
Sa interview sang Bombo Radyo Bacolod kay Police Lt Col. Salvador Trono, ang lalaki ang ginkilala lamang kay Alyas Jojo ukon Alyas Cesar Castro, 68 anyos.
Nagpadala naman sang letter ang RCP Security Agency sa Talisay City Police Station kasubong man sa Bombo Radyo Bacolod nga nagapaathag nga indi kabahin sang ila security agency ang lalaki nga nagpalupok sang armas.
Sa karun wala pa matumod kun ngaa yara sa area ang lalaki kag kun ini ang tawo sang tag-iya sang gina-agawan nga duta nga si Paul Chang.
Narecover naman sa lugar ang isa ka basiyo sang cal. 45.
Sa karun, ang criminal complaints nga grave threat, illegal discharge of firearms kag violation sa Comelec Gun Ban pa lamang ang ila nga gintutukan batok kay Alyas Jojo.
Samtang ginalantaw man nila kun may administrative liabilities ang mga security personnel nga kaupod sang nagpaniro.
Suno diri, sang 2020 si Alyas Jojo ang napriso man bangod sa illegal discharge of firearms kag grave threat kag sa karun yara pa sa probation.
Pahayag sini nga sila ang regular man nga nagaroving sa area, apang ginakasubo sini nga kahapon imbes ireport sa kapulisan ang insidente ang ginpost lamang sa social media.
Ginpangita pa sang mga ini ang gintutukan sang armas agud madala sa police station kag makuhaan sang statement.
Panawagan sini sa mga pumuluyo nga involved sa conflict nga magpasaka sang kaso kag indi lamang matapos sa pagpablotter.
