Mahimo nga mapasakaan sang kaso ang isa ka lalaki nga gin-alegar nga nagpanampa sa isa ka babayi sa kapehan sa Barangay Villamonte, Bacolod City.
Madumduman nga ginreklamo sang babayi nga biktima sang physical injuries ang lalaki nga nagtampa sa iya sa Purok 7, Ylac St, Brgy Villamonte, Bacolod City, sang Hulyo 22, alas-12:30 sang udto.
Ang biktima ang ginkilala nga si Anely Española, 43 anyos, residente sang nasambit nga lugar.
Sa interview sang Bombo Radyo Bacolod kay Police Major Marc Joel Reclamado, station commander sang Bacolod Police Station 4 nga gin-refer na nila sa Barangay ang concern kag kun indi masettle mahimo nga mangatubang sang kaso ang suspect.
Natumod naman sang mga kapulisan ang suspetsado apang wala pa ginwaragwag sa kahanginan ang pangalan sini.
Suno sa station commander ginahulat nalang sa karun ang mangin resulta sa pag-atubangay sang duha sa Barangay.
Una na nga ginpahayag ni nagatakod ini sang tarpaulin sa atubang sang iya balay sang may nag-abot nga Montero Sport nga grey.
Nagpark ang salakyan sa atubang sang iya balay kag iya ginhambalan ang lalaki nga kun mahimo sini nga idogon ang iya salakyan sa kahangwa nga maigoan ini sang kawayan kag magasgasan.
Apang ini ang ginkaakig sang lalaki.
Naglakat ang lalaki kag nagpangape sa coffee shop apang sa pagbalik sini, iya ginkompronta si Espaniola kag namangkot kun ngaa ginhambalan niya ini nga tikalon.
Apang suno sa biktima, wala siya may ginhambal nga amo nga tinaga bangod may gina-esturya ini para magpatakod sang internet.
Nagka-argumento ang duha tubtob nga ginkuha sang lalaki ang plastic envelope ni Anely Española kag gintampa sini sa iya sang duha ka beses.
Kasunod sini, tuyo kuntani sang lalaki nga kuhaon ang botilya sang softdrinks apang maayo lang nga natumba ang botilya kag wala niya nalab-ot.
Ginhampak man sang lalaki sang sinsilyo si Española kag sang nakita nga ginavideohan siya, nagtuyo ini nga kuhaon kuntani ang cellphone sang biktima.
