Nadakpan na sa Guimaras alas-10:36 kaina sang aga ang lalaki nga nanaya kag nagpalupok sang armas luthang sa gina-agawan nga duta sa Hacienda San Antonio Dos, Barangay Dos Hermanas, Talisay City.
Madumduman nga nakuhaan sang video kag madasig nga naglapta sa social media ang pagpanaya kag pagpalupok sang armas ni Jose Alontaga Jr, Alyas Jojo ukon Alyas Cesar Castro, 68 anyos, residente sang Brgy. Efegenio Lizares, Talisay City batok sa mga Comprehensive Agrarian Reform Program (CARP) Beneficiaries.
Si Alontaga ang wala naman dayun nakita sa nasambitan nga lugar sang maglapta ang video, samtang ginpanginwala naman sang security agency nga ini ang ila tinawo.
Ang suspect nga ginakilala nga Top 3 Most Wanted Person sang Talisay City Police Station ang may warrant of arrest sa kaso nga grave threat in relation sa Section 29 sang Republic Act 10591 ukon Comprehensive Firearms and Ammunition Regulations Act kag paglapas sa Section 261Q sang Batas Pambansa 881 ukon Omnibus Election Code.
Siya ang nadakpan alas-10:36 kaina sang aga sa Brgy Tamia sa banwa sang Buenavista, Guimaras.
P36,000 ang ginarekomendar nga pyansa para sa paglapas sa Omnibus Election Code samtang P120,000 naman ang sa grave threat.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, nadakpan si Jose Aluntaga Jr, 68 anyos, sa banwa sang Buenavista, probinsya sang Guimaras, kaina sang aga matapos ini nga ginserbehan sang warrant of arrest.
Si Aluntaga ang nagapangatubang sang kaso nga grave threat, Republic Act (RA) 10591 ukon Comprehensive Firearms and Ammunition Regulation Act kag COMELEC Gunban.
Pahayag ni Jocson, nadakpan si Aluntaga sa Guimaras sa lugar kun diin residente ang iya asawa.
