Patay ang isa ka lalaki matapos nga magtambag sa kinagamo sa Sitio Buringot, Barangay Odiong, Moises Padilla, Negros Occidental sang Agosto 2 sang gab-i.
Ginkilala ang biktima kay alyas Andoy, 26 anyos, lalaki, may live-in partner kag residente sang nasambit nga lugar samtang ang suspek ang ginkilala kay alyas Danny, ginabanta 20 anyos, may live-in partner kag residente sang Barangay Kamandag, La Castellana, Negros Occidental.
Sa interview sang Bombo Radyo Bacolod Police Major Ryan Villasario, Chief of Police sang Moises Padilla Municipal Police Station, nakahunong na sa Moises Padilla Municipal Police Station ang suspek matapos magsungka sa mga kapulisan.
Suno kay Villasario, nagatindog ang biktima malapit sa isa ka waiting shed sang nag-abot sa lugar ang suspek kag tatlo ka mga kaupdanan sini nga nagsinggit sang inaway.
Gintinguhaan sang isa mga nagapuyo sa lugar nga pakalmahon ang suspetsado apang nasumbagan ini.
Nagpatambag ang biktima apang gulpi lang naggabot sang bladed weapon ang suspek kag ginbuno ang biktima sa tiyan kag tuo nga butkon.
Gilayon man nga nagpalagyo ang suspek kag ang iya mga kaupdanan matapos ang insidente.
Gindala pa sang Moises Padilla MDRRMO ang biktima sa Ignacio Arroyo Lacson Sr. Memorial District Hospital sa Isabela, Negros Occidental, apang gindeklarar nga Dead on Arrival (DOA).
Sa karun ginapreparar sang mga kapulisan ang pagpasaka sang kaso nga murder sa suspetsado.
