Suki na sang Barangay Hall sa Barangay Granada, Bacolod City ang lalaki nga nagpanapungol sa nagaperform sang drama sa isa ka talent contest sa kapiestahan sa Hacienda Carmen, sa nasambitan nga Barangay.
Sa interview sang Bombo Radyo Bacolod kay Police Captain Portia Nillosan, station commander sa Bacolod Police Station 5, ang suspetsado ang ginkilala nga si Allan Fernandez, 48 anyos, single kag residente sa Purok Mirasol, Barangay Granada, Bacolod City
Nahibaluan nga samtang nagadrama ang duha ka contestants kag ginaportray ang pagpangastigo kag tuyo nga paglugos sang amo sa isa ka overseas Filipino worker, hinali na lamang nga nagsaka sa stage si Fernandez kag gintapungol ang lalaki.
Gilayon man ini nga gintambagan, apang may isa ka lalaki nga nagtapungol man kay Fernandez.
Ginkumpirmar ni Nillosan nga yara sa impluwensya sang makahulubog nga ilimnon ang suspetsado.
Ini ang napriso sang 10 ka tuig bangod sa kaso nga rape with homecide kun sa diin minor de edad ang iya nangin biktima.
Sang 2022, ginpasakaan man ini sang kaso nga murder bangod gina-alegar nga siya ang may ginbuno-patay, apang nadismiss ang kaso bangod sa kakulang sang witness.
Suki man si Fernandez sa Barangay, bangod ini ang masami nga ginareklamo sa ginahimo sini nga mga pag-iskandalo sa tion nga maka-inom.
Siya man ang ginatudlo nga suspetsado nga nag-utod sang tubo sa tangke sang tubig sang Barangay.
Apisar sa pag-iskandalo sa kapiestahan, ini ang wala na ginreklamo sang mga biktima.
