Wala na nagpauli ang suspetsado nga nagpatay sa nakabais niya sa parkingan sa gwa sang hardware sa Barangay Ma-ao syudad sang Bago kahapon sang aga antes ini nagbalik kag nangluthang.
Sa interview sang Bombo Radyo Bacolod kay Police Senior Master Sergeant Job Ogares, chief investigator sang Bago City Police Station, nag-umpisa ang krimen sa paglalisay ni Jomel Alinsuring, ang utod sang biktima nga si Ephraem Alinsuring, kag ang suspek nga si Jonas Lohan Tobongbanua bangud sa pagpark sang motorsiklo kag tricycle.
Nahibaluan nga nauna si Jomel sa parkingan apang nag-una si Jonas sa pagplastar sang tricycle.
Una naman nga nagbiya sa lugar si Tobongbanua kaupod ang iya hinablos nga si Rene Jun Flores nga amo ang nagmaneho sang motorsiklo.
Base sa makita sa CCTV, nagbalik si Tobongbanua kag Flores sa atubang sang hardware makaligad ang tatlo ka minutos kun sa diin yara gihapon ang mag-utod nga Alinsuring.
Gintindakan ni Tobongbanua si Jomel nga nagatalikod sa dalan gani nagtambag ang iya magulang nga si Ephraem.
Hinali nga naggabot sang armas-luthang si Tobongbanua nagikan sa iya nga hawak kag gintiro si Ephraem nga naigo sa tiyan.
Gintiro man sini si Jomel apang maswerte nga nakapalipod sa tricycle.
Sang nagpalagyo na si Tobongbanua gintilawan man sang amay nanday Ephraem kag Jomel nga ini ang lagson apang wala nalab-ot.
Makita man sa CCTV nga may naghampak pa sa mga suspetsado antes makapalagyo.
Sang makalab-ot sa unhan ang suspek, kapin 15 tubtob 20 metros sa gintabuan sang insidente, yara naman ang katapo sang Philippine Army nga si Herson Narciso.
Sa pagdumdom nga miyembro sang SPARU sang NPA ang suspetsado, gintiro sang suldado ang motorsiklo kag naigo si Flores sa tiyan.
Ginpahayag man ni Narciso sa mga kapulisan nga wala man ini makasiguro kun may naigo sang gintiro niya ang motorsiklo.
Narekober naman ang caliber .45 pistol nga gingamit sang suspek.
Gindeny man ni Tobongbanua nga ginapanag-iyahan niya ang armas-luthang.
Matapos nga madakpan sang kapulisan si Tobongbanua kasunod sang hot pursuit operation, didto natukiban nga si Flores ang may igo sa tiyan kag sa karun yara sa South Bacolod Hospital kag nakahospital arrest.
Samtang nakahunong naman si Tobongbanua sa Bago City Police Station kag magapangatubang sang kaso.
