Ginpaidalom na sa inquest proceedings kahapon sang hapon ang duha ka mga suspetsado nga nagtiro sa tatlo ka mga babayi sa Sitio Pantao, Brgy. Pandan, Pontevedra sang Enero 21 kun sa diin isa ang patay kag duha ang pilason.
Madumduman nga ang mga biktima amo sanday Ana Oñas nga dead on the spot samtang pilason naman sanday Georgelyn Linigao, 51 anyos kag Josselino Duban, 55 anyos lunsay mga residente sang nasambit nga lugar.
Sa interview sang Bombo Radyo Bacolod kay P/Capt. Hansel Lumandaz, hepe sang Pontevedra Municipal Police Station, ginpahayag sini nga gilayon nila nga nadakpan sang Huwebes si Nelson Espadera, 39-anyos samtang boluntaryo naman nga nagsungka kahapon sang aga si Pedro Oñas, 41-anyos.
Nahibaluan nga nagalakat ang mga biktima kag ginbantayan sang mga suspetsado kag ginluthang.
Nakaangkon sang igo sa tiyan kag kilid si Ana nga gintunaan sang iya kamatayon.
Narecover sang mga pulis ang duha fired cartridges sang 45 caliber pistol sa crime scene.
Ginapahayag nga magparyentehanay ang mga biktima kag si Pedro apang may daan nga hiligut-anon bangud sa land dispute.
Sa karon yara na sa estable nga kondisyon sanday Linigao kag Duban.
