Ginsunog sang isa ka lalaki ang kaugalingon sini nga balay samtang yara man sa sulod sang iya panimalay sa Purok Paghidaet, Brgy Tangub, ciudad sang Bacolod, kapin alas- 7:00 sang gab-i.
Suno kay Joeresty Villaluna, 50 anyos, nga luyag lang sini nga sunogon ang gamit sang iya asawa apang naglapta ang kalayo.
Samtang, sa interview sang mga residente, naga-isahanon lang si Villaluna sa iya balay bangod ginbayaan ini sang iya asawa kag mga kabataan nga iya ginakastigo.
Masami man ini nga magmaoy kag mag-eskandalo sa area kun sa diin bisan mga kabataan nga yara sa dalan ang iya pa ginapangkadis sa ulo.
Bangod sa ginhimo ni Villaluna, siya ang ginkastigo sang mga residente kag nag-agom sang pilas sa ilong.
Nagresponde sa area ang masobra tatlo ka firetruck kag ginsturya pa sang personnel sang Bureau of Fire Protection (BFP), Disaster Risk Reduction & Management Office (DRRMO) kag Bacolod City Police Office (BCPO) ang lalaki bangod indi ini maggwa sa iya balay sa karun yara sa kustodiya sang Bacolod Police Station 8 si Villaluna.
