Natumod nga courier kag mahimo isa lang ang ginakuhaan sang suspetsado nga nakuhaan sang masobra P7 million kag ang mag-utod nga nakuhaan sang masobra P13.6 million nga balor sang suspected shabu sa separado nga buybust operation sa Silay City, Negros Occidental sang Domingo.
Madumduman nga masobra P7 million ang balor sang iligal nga droga nga nakumpiskar kay Mark Villaran sa drug buybust operation nga ginpatigayon sa entrance sang Mallery 2 Subdivision, Barangay Rizal , Silay City, Negros Occidental sang Agosto 28 alas-9:45 sang gab-i.
Una nga nadakop ang mag-utod nga sanday Angie kag Angielyn Dumdumaya sang Domingo sang aga kun sa diin narecover ang masobra P13.6 million nga suspected shabu.
Suno kay P/Lt Col. Mark Anthony Darroca, hepe sang Silay City Police Station, naggwa ang ngalan ni Villaran sang ginhibalo ang nagakuha sang shabu sa mag-utod.
Natumod sang mga ini nga ang mag-utod nga Dumdumaya ang ginakabig nga bodegera samtang si Villaran naman ang courier.
Wala sang relasyon ang mag-utod kag si Villaran magluwas sa transaksyon sang iligal nga droga kun sa diin ini ang nagakuha kag nagadul-ong sang suspected shabu santo sa instruction sang iya nga boss.
Nagapati naman ang mga ini nga mahimo isa lang ang boss sang mga suspetsado.
Suno kay Darroca ang kapin isa ka kilo nga suspect shabu ang natalana palang kuntani nga ideliver sang suspetsado.
Natumod naman sang mga ini nga gikan sa Luzon ang suspected shabu apang wala pa matumod kun sa diin mismo nga lugar nagikan.
Sa karun, padayun pa ang imbestigasyon sang mga kapulisan sa iban pa nga mga personalidad nga yara sa contacts sang mga nadakpan sa buybust operation.
