Madugangan ang kaso nga atubangon sang lalaki nga nakuhaan sang magic mushroom kadungan sang buybust operation nga ginpatigayon sang Bacolod Police Station 5 sa Barangay Cabug, Bacolod City sang Hulyo 18.
Madumduman nga nakuha kay Franz Tolmo ang masobra tatlo ka kilo nga dried magic mushroom nga nabakal sang poseur buyer sang mga otoridad.
Suno kay Police Major Joery Puerto, station commander sang Bacolod Police Station 5, tinalikdan nga semana, nag-abot ang chemistry result nagikan sa PNP Central Office bangud ginpadala didto sang NOCPPO Crime Laboratory ang specimen.
Santo sa chemistry result, ang magic mushroom ang ginakabig man nga dangerous drug bangud sa psilocybin content sini.
Ang psilocybin ang nagatuga sang hallucination sa indibidwal nga naggamit.
Bangud sini, pasakaan man si Tolmo sang violation sang Section 11 sang RA 9165 ukon Comprehensive Dangerous Drugs Act ukon possession of illegal drugs magluwas sa nauna nga kaso nga violation sang Section 26 ukon conspiracy nga ginpasaka sa iya matapos nga ila ang nadakpan sa Barangay Cabug.
Nauna na nga ginpahayag ni Tolmo nga ginpagamit niya ang magic mushroom sa isa ka tawo nga may diperensya sa paminsaron kag nangin maayo ini istoryahon apang makaligad ang tatlo ka oras, nanghaboy naman ini sang bato.
Suno kay Puerto, nakahibalo na sila kun ano ang kaso nga ipasaka sa masunod nga mga madakpan nga nagabaligya sang magic mushroom.
