Duha ka semana ang ginpatigayon nga monitoring sang Bacolod City Drug Enforcement Unit antes natigayon nga maaresto ang suspek nga nakuhaan sang masobra P3 million nga balor sang suspected shabu sa Barangay Tangub, syudad sang Bacolod.
Sa interview sang Bombo Radyo Bacolod kay Police Capt Joven Mogato, pinuno sang Bacolod City Drug Enforcement Unit, duha ka semana antes ginpatigayon ang buybust operation may nakuha ang katapo sang Bacolod City Drug Enforcement Unit nga impormasyon nga may yara sang nagabaligya sang illegal nga druga sa syudad gani ginpavalidate sang mga ini ang nakuha nga impormasyon.
Suno kay Mogato, kahapon sang aga, madinalag-on nga napatigayon sang mga ini ang buybust operation kun sa diin natigayon nga nakumpiskar ang masobra P3 million nga balor sang illegal nga droga sa 26 anyos nga lalaki sa Lino Moles Street, Purok Kapawa, Barangay Tangub, Bacolod City.
Suno kay Mogato, ginakabig nga high value individual ang suspetsado nga si Sean Navarro, 26 anyos, residente sang Purok Kasilingan, Barangay Mansilingan, sa nasambit nga siyudad apisar nga newly identified drug personality ini bangud dako nga balor sang illegal nga druga ang nakuha sa paghinakop sini.
Nakuha kay Navarro ang kapin 506 grams sang suspected shabu nga may standard drug price nga P3,440,800.
Sa karun yara na sa kustodiya sang Police Station 8 ang suspetsado kag natalana nga pasakaan sang kaso.
