Ginpahayag sang pinuno sang City Drug Enforcement Unit (CDEU) nga kabayo lamang ang lalaki nga nakuhaan sang P1.7 million nga balor sang illegal nga druga sa Purok Lampirong, Barangay 2, Bacolod City.
Sa interview sang Bombo Radyo kay Police Lt. Joven Mogato, nakabaton sila sang report nga may nagabaligya sang illegal nga druga sa mga drivers sang truck kag ang subject ang ginkilala kay Christian Oliveros, residente sa Purok Malipayon, Barangay 35, Bacolod City.
Ang suspetsado ang ginakabig nga high value individual (HVI).
Suno kay Mogato, siya ang kabayo lamang kag may nagasugo diri nga magdeliver sang illegal nga druga.
Ang iya naman nga parte amu ang iya ginabaligya sa mga truck drivers.
Nakuha sa paghinakop sini ang 14 ka gamay kag tatlo ka nakabugkos nga sachet sang suspected shabu nga nagabug-at sang 250 gramos kag may ginabanta balor nga P1.7 million.
Nakuha man gikan diri ang P1,000 nga marked money kag isa ka gamay nga bag nga naga-unod sang P300 nga cash proceeds.
Suno diri, may yara lamang sang nagahatag sa iya sang supply paagi sa pagmeet-up kag siya na ang magadistribute sini.
Sa karun, ginahibalo pa sang CDEU kun may koneksyon si Oliveros sa mga suspetsado nga nadakpan sa buybust operation sa Barangay Singcang Airport, Bacolod City kun sa diin nakumpiskar ang kapin P1.3 million nga balor sang illegal nga druga.
