Matapos ang malapit isa ka semana nga pagpangita, nagakaagnas na ang bangkay sang isa ka lalaki sang ini ang makit-an sa sulod sang kweba sa banwa sang Candoni.
Sa interview sang Bombo Radyo Bacolod kay Nicholas Lachica, pinuno sang Candoni Assistance, Rescue and Emergency Services, ginpahayag sini nga Oktubre 30 ulihi nga nakit-an ang biktima nga ginkilala kay Jimuel Garsola sa Brgy. Jaba nga naga-inom sa iya nga tupad balay kag pagkasunod nga mga inadlaw, wala na ini nagsulod sa iya nga ubra.
Kahapon, suno kay Lachica, may nausoy ang mga residente nga dalan nga nagapadulong sa isa ka kweba malapit sa balay nga gin-imnan sang biktima kag tuman ka baho ang huyop sang hangin.
Sang ginsulod ang kweba, didto nasapwan ang bangkay nga indi na malaragway ang sitwasyon bangud yara na ini sa advanced state of decomposition.
Ginkompirmar niya man nga gingutrab ang liog sang biktima kag may yara ini sang mga pilas sa likod tuga sang pagbuno ukon paglabo.
Kagab-i, ginlubong na sang pamilya ang bangkay sang biktima.
Suno sa hepe sang Candoni Police Station Police Captain Celjun Nemenio, padayon pa ang ila pagtumod sa suspetsado.
Isa sa ginalantaw amo nga ginpatay ang biktima sa iban nga lugar kag gintagbong lang sa kweba.
