Ginpasakaan na sang kaso ang isa ka persona nga nadakpan matapos nga nagpamukpok sang bato kag nagpang-agaw sang tricycle sa Bacolod Economic Highway, Hda Gonzaga, Brgy Mansilingan, Bacolod City.
Magapangatubang ang suspek nga si Alyas Almer sang kaso nga robbery with homicide matapos nga ang biktima nga si Edmund Tolosa ang napatay.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, ang biktima nga una na nga gindala sa Corazon Locsin Montelibano Memorial Regional Hospital, apang alas-3:30 sang hapon sang tinalikdan nga adlaw ang ginbawian sang kabuhi bangod sa severe traumatic brain injury.
Suno kay Santillan, bangud sini ginliwat nila ang ginpasaka nga kaso nga robbery with frustrated homicide kag ginhimo nga robbery with homicide.
Ang suspek ang nakahunong sa karun sa Bacolod Police Station 7.
Madumduman nga naaresto si Almer matapos nga ginpukpok sini ang ulo sang driver sang tricycle nga ginsakyan niya matapos nga nagpakuno-kuno nga pasahero kag nagpadul-ong sa Hacienda Guanzon.
Apang pag-abot sa nasambit nga lugar, ginlampusan sini ang driver sang bato kag sang nalipungan, ginhal-id niya ini sa higad sang dalan kag gintaban ang tricycle antes nagpadulong sa ciudad sang Bago.
Nadakpan naman sang mga kapulisan sang Bago City Police Station ang suspek kag narecover man ang tricycle man ang tricycle.
