Natalana nga pasakaan sang kaso nga Grave Threat kag Robbery ang isa ka lalaki nga nang-agaw sang shotgun nagikan sa isa ka security guard sang warehouse sa Barangay Singcang Airport, Bacolod City.
Suno kay P/Capt. Jun Ray Batadlan, station commander sang Bacolod Police Station 8, takna alas-2:30 kahapon sang kaagahon sang maglabay sa warehouse sang Fast Cargo Logistics ang suspetsado nga ginkilala kay Reymark Hilado, 22 anyos kag reidente sa Proper Barangay Lantad, Silay City, apang nahibaluan nga July Hilado ang matuod-tuod nga pangalan santo sa kumpirmasyon sang Silay City Police Station.
Suno kay Batadlan, bangod kaagahun, nagadula-dula na ang animo sang security guard nga ginkilala kay Warlito Perocho, 50 anyos kag residente sa Paglaum Village, Barangay Pahanocoy, Bacolod City gani nakakita sang kahigayunan si Hilado nga agawon ang shotgun.
Gilayon naman nga nakabatyag ang Security Guard gani nag-agaway sila sang armas apang bangod lamharon ang suspetsado, nakuha gid sini ang shotgun kag gintaya kay Perocho.
Suno kay Batadlan, luyag kuntani palukpon ni Hilado ang armas apang indi ini makahibalo maggamit kag nakasafety pa ang shotgun gani wala ini naglupok.
Gilayon naman nga natalupangdan sang mga security guard sa katupad nga mga warehouse ang hitabo gani nagbulig ang mga ini nga madakop ang suspetsado.
