Nafile na ang kaso nga attempted murder sa lalaki nga naglampos sang tubo sa ulo sang isa ka pulis sa Luzuriaga Street, Bacolod Central Market, sa downtown area, Bacolod City.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, sa karun nagapabilin pa sa ospital ang suspect nga si Alyas Juan, 56 anyos.
Estable na ang kondisyon sini, apang nagapaayo pa kag ginabantayan lamang sang mga kapulisan sang Bacolod Police Station 1.
Suno kay Depasucat, sa tion nga marelease na sa ospital, ini ang deretso na nga pagadal-on sa prisuhan.
Si Alyas Juan ang magapangatubang sang kaso nga Attempted Murder, kag ang standing warrant sini sa Physical Abuse.
Madumduman nga ang personnel sang Police Station 1 nga may ranggo nga Police Chief Master Sergeant, ang nagsaway lamang sa mga nakita sini nga naga-inom sang makahulubog nga ilimnon apisar nga adlaw na sa Central Market.
Apang si Alyas Juan ang hinali na lamang nag-intra sa pagbaisay.
Magalakat na kuntani ang pulis, apang ini ang ginsundan ni Alyas Juan kag ginlampusan sang tubo sa ulo.
Ini ang nagtinguha nga magpalagyo, gani napilitan man ang pulis nga ini ang tiruhon sa paa.
