Wala sa gihapon sang identity ang lalaki nga nasapwan nga wala na sang kabuhi sa katubuhan sa Purok Maasin, Barangay Dulao, Bago City, kahapon sang aga.
Sa interview sang Bombo Radyo kay Police Senior Master Sergeant Job Ogares, chief investigator sang Bago City Police Station, wala sa gihapon sang identity ang bangkay bangod yara na ini sa advanced state of decomposition kag indi na matumod ang hitsura sini kag dugang pa nga wala ini sang identification cards ukon ano man nga makahatag sang identification.
Ini ang nasapwan nga nagahapa, wala sang pang-ibabaw nga bayo, nakamaong nga itom kag wala sang tsinelas.
Ginabanta nagaedad ang biktima sang masobra 30 tubtob 35 anyos kag 5’4 ang kataason.
Suno kay Ogares, nagapanglakaton sa dalan si Roselyn sang nakapanimaho ini sang indi manami nga baho kag sang ila ginpalapitan ang hilamunan, didto nasapwan ang bangkay.
Sa ila pagpangusisa sa mga residente, sila ang may nabatian nga isa ka lupok sang Domingo, apang indi pa makumpirmar kun lupok sang armas.
Indi man makumpirmar kun may yara sang buho ang lawas sang biktima kag kun ang iya mga pilas ang tuga sang luthang, buno ukon labo.
