Ginkumpirmar sang punong barangay sang Barangay 35, Bacolod City nga indi residente sang ila barangay ang bangkay nga nasulod sa sako nga nasapwan sa bakante nga lote sa Purok Malipayon kahapon.
Sa interview sang Bombo Radyo Bacolod kay Punong Barangay Reuben James Miranda, ginpahayag sini nga wala gid siya sang ideya kun sin-o kag taga-diin ang biktima.
Suno kay Miranda, posible nga sa kilid baybay ukon sa pika-pika nag-agi ang mga suspetsado kag indi sa main road. Pananglitan nga sa main road ang mga ini naglabay, nakita ang mga ini sang auxiliary team nga nagabantay sa coastal area.
Sa karon suno sa punong barangay, nagpahamtang ini sang duha ka mga persona sa lugar agud magbantay agud indi na masulit ang natabo.
Samtang, ginkumpirmar naman ni P/Major Jovil Sedel, hepe sang Bacolod Police Station 1, nga wala pa sang may nag-claim sa bangkay.
Suno sa hepe, isa sa mga anggulo nga ila ginalantaw sa pagsalvage sa biktima amo ang kaangtanan sa iligal nga druga.
Sa karon indi pa matumod ni Sedel ang ginkamatay sang lalaki bangud nga wala pa ini napaidalom sa autopsy.
Apang santo sa initial examination sang SOCO, may yara sang pilas sa ulo kag tiyan ang biktima.
