Suspect sa kinawatay sa ciudad sang La Carlota kag isa man ka drug personality ang lalaki nga ginpatay kag nasapwan sa Palanca Street, Barangay 2, ciudad sang Bacolod sang Miyerkules sang hapon.
Ang biktima ang ginkilala kay Marlon Ilustrisimo sang Barangay Cubay, ciudad sang La Carlota kag mismo ang pamilya man sini ang nagkumpirmar sang iya identity.
Suno kay Police Lt. Col. Lowell Garinganao, hepe sang La Carlota City Police Station, si Ilustrisimo ang isa sa mga suspetsado sa kinawatay sa nasambit nga ciudad kag ginahulat nalang nga mafile sang kaso ang ginkawatan.
Ang ulihi nila nga ginkawat ang lima ka sako nga saway sa Barangay RSB kag kaupod sini sa grupo ang duha ka iban pa nga lalaki.
May yara man sila sang salakyan nga ginagamit.
Target man ini sa drug buybust operation bangud ginakabig ini nga drug personality bilang street level individual.
Suno kay Garinganao, yara sa drugs watchlist si Ilustrisimo kag madugay na ang monitoring nila diri bangud may mga tinion nga wala man ini sa ciudad sang La Carlota.
Ila man ginkakibot sang nabalitaan nga ginpatay ang biktima.
Si Ilustrisimo ang ginapahayag nga nagapanghilamon sa kampo sang tubo apang may iban ini nga grupo sa ciudad sang Bacolod kun sa diin siya masami nagatinir kag diri man ini ginaalegar nga nagakuha sang drug supply.
Ginatugyan naman niya sa mga kapulisan sa Bacolod Police Station 2 ang pagsolbar sa kamatayon ni Ilustrisimo bangud diri ini natabo.
