Ginlubong na ang lalaki nga nasapwan nga wala sang kabuhi sa kilid sang dalan sa Prk Langka, Brgy Pacol, Bago City sang Hulyo 2, alas- 10:30 sang aga.
Ang biktima ang ginkilala nga si Raymart Roxas, alyas “Mickey Mouse”, nga nasapwan nga naputos sa habol kag ginputos ang bilog niya nga lawas sang duct tape.
Nakabaklid ang kamot ni Roxas sa likod nga ginhigot sang wire kag ginputos sang pink nga duct tape ang iya liog.
Sa interview sang Bombo Radyo Bacolod kay Negros Occidental Police Provincial Office Spokesperson Police Captain Judesses Catalogo, wala sang CCTV sa area kun diin nasapwan ang bangkay ni Roxas.
Suno diri, tuig 2018 may kaso si Roxas sa Bacolod Police Station 2 angot sa illegal gambling kag tuig 2024 may kaso naman ini sa Bacolod City Police Station 1.
Suno kay Catalogo, ginpalubong na sang Local Government Unit sang Bago City ang bangkay ni Roxas sa public cemetery sa barangay Ma-ao nga may consent man halin sa pamilya.
