Patay ang isa ka lalaki nga nagasakay sa motorsiklo matapos matup-an sang container van nga wala nalock sang drayber nga nagamaneho sang Fuso truck sa Barangay E. Lopez, siyudad sang Silay, kagab-i.
Sa interview sang Bombo Radyo kay Tibo sang Silay City Disaster Risk Reduction and Management Office, nakasakay sa motor ang biktima nga si alyas “Ambok” residente sang Purok Bonifacio, Brgy E.Lopez sang iya nasugata ang truck nga ginamaneho ni alyas “Tapol” residente sang Hda Banilad, EB Magalona.
Suno diri, naglabay sa kilid sang truck ang motorsiklo apang nasalawid sa puno sang indian mango ang empty container van nga karga sang truck, kag bangod nga wala ini na-lock hinali ini nga nadagdag kag natup-an sa ulo ang biktima.
Matapos ang insidente gilayon nga nalagyo ang drayber bitbit ang yabi sang truck kag tubtob sa karun wala pa ini nakit-an.
