Pilason ang 31 anyos nga lalaki matapos ginluthang sang tatlo ka beses sa Purok Chariza 2, Barangay 27, Bacolod City kapin alas-9:45 kagab-i.
Sa interview sang Bombo Radyo Bacolod kay Police Staff Sgt. Ronald Decatoria, imbestigador sang Bacolod Police Station 4, may ginpadulongan nga abyan ang biktima nga si John Ryan Layaon, 31, wala sang trabaho kag residente sa Block 23 Lot 18, Purok Sto. Domingo, Barangay Handumanan sa Purok Chariza 2, kun sa diin ini ang masami man nga nagalagaw sa lugar.
Apang kagab-i, ini ang hinali na lamang nga ginpalapitan sang persona nga nakahelmet kag naka-itom nga jacket kag gilayon nalang nga ginluthang sang makatatlo ka beses.
Ang biktima ang nakaangkon sang igo sa nawala nga dughan kag tiyan.
Gilayon naman ini nga ginhingagaw sang iya nga mga abyan sa Riverside Medical Center agud madapatan sang nagakaigo nga pagbulong, samtang nahimo naman nga makapalagyo sang suspetsado.
Narecover naman sa lugar ang isa ka empty shell kag duha ka dead bullet sang cal. 45 pistol.
Suno kay Decatoria, si Layaon ang ginluthang man tinalikdan nga bulan sa iban nga lugar, kag ini ang mapalarun nga wala nasentrohan.
Nahimo naman sini nga makilala ang nangluthang sadto kag napasakaan na sang kaso.
Apang ang suspetsado sa karun nga shooting incident ang nagapabilin pa nga wala makilal-an.
Suno kay Decatoria, may-ara sang CCTV camera nga nakatutok sa crime scene kag sila ang magahingyo pa sang permiso gikan sa Punong Barangay sa Barangay 27 agud mareview ang CCTV footage.
Sa inisyal nga imbestigasyon, wala man sang matumod ang mga abyan sang biktima nga ini ang may nakaaway ukon may kaakig diri nga mahimo motibo sa pagpangluthang.
