Patay ang isa ka lalaki nga tumandok sang Passi City, Iloilo matapos mabun-an sang nagtambag sa kinagamo sa isa ka baylihan sa Sitio Ipil-Ipil, Barangay Mambulac, Silay City kahapon alas-3:20 sang kaagahon.
Sa interview sang Bombo Radyo Bacolod kay Police Major Sarah Villanueva, officer-in-charge sang Silay City Police Station, ang biktima ang ginkilala nga si Dennis Esposado, 40 anyos, residente sa Passi City, Iloilo apang temporaryo nga nagapuyo sa nasambitan nga Sitio.
Samtang ang suspetsado ang ginkilala naman nga si Jeffrey Baldonoza, residente sa Zone 4 sa kaangay man nga Barangay.
Suno kay Villanueva, may-ara sang ginpatigayon nga benefit dance ukon fund raising activity sa nasambitan nga Sitio apang sang nagdangat na sa alas-3:00 sang kaagahon, ginpahayag na sa mga residente nga pagapatyon na ang music.
Apang bangod madamo sang hubog, wala ang mga ini nagsugot nga patyon ang music nga nagtuga na sang komosyon.
Nagtambag lamang kuntani si Esposado agud nga indi na maglala pa ang away, apang siya ang hinali nga ginbuno sang makaduha ka beses ni Baldonoza kun sa diin siya ang naka-angkon sang pilas sa natuo nga dughan kag nawala nga abdomen.
Matapos ang insidente gilayon man nagpalagyo ang suspetsado samtang ang biktima ang ginhingagaw naman sa Teresita Lopez Jalandoni Provincial Hospital apang ini ang gindeklarar na nga dead on arrival.
Padayun naman ang follow up kag hot pursuit operation sang mga kapulisan agud madakpan ang suspetsado.
