Patay ang isa 41-anyos nga lalaki matapos ginbuno sa Purok Nanca, Brgy. 3, Bacolod City alas 5:20 kahapon sang hapon.
Sa interview sang Bombo Radyo kay Police Capt. Leo Estopa, hepe sang Bacolod Police Station 2, naga-inom ang biktima nga si Dennis Panigue, 41 anyos kag residente sang nasambit nga lugar kaupod ang iya mga abyan sang nag-abot ang suspetsado nga si Judy Inopia, 50 anyos, kag luyag kuntani nga mag-intra sa ila.
Suno kay Estopa, bangud hubog na si Inopia, wala nila ini ginpaintra inom.
Suno sa iya, nagpauli kag nagkuha sang patalum ang suspetsado, nagbalik sa lugar kag hinali lang nga ginbuno si Panigue.
Nakaangkon ini sang pilas sa nagkalain-lain nga bahin sang iya lawas nga gintunaan sang iya kamatayon.
Suno sa hepe, malagyo pa kuntani ang suspetsado apang natigayon nila ini nga madakpan.
Sa karun, yara si Inopia sa kustodiya sang Bacolod Police Station 2 para sa proper disposition.
